क्षमा करावी सर्व चुकांची विसरूनिया अहम्
मिच्छामी दुक्कडम म्हणतो मिच्छामी दुक्कडम || धृ ||
ऑफिसमधील तणाव म्हणजे असतं समरांगण
खालच्यांवर अरेरावी करूनी वरच्यांशी भांडण
आज मात्र विसरा प्रमादास विसरूनी सर्व नियम
मिच्छामी दुक्कडम म्हणतो मिच्छामी दुक्कडम || १ ||
तणाव ऑफिसमधले घरातसुद्धा झिरपत जाती
शब्द वाकडा बोलून जातो विसरून सारी नाती
स्पष्ट क्षमा ही पत्नी मुलांची बोल नाही मोघम
मिच्छामी दुक्कडम म्हणतो मिच्छामी दुक्कडम || २ ||
मातपित्यांना चिंता वाटे किती झालो जरी मोठा
वेळ मोकळा खात जात असे वॄद्ध वयाने होता
सुटला असेल माझा बोलत असताना संयम
मिच्छामी दुक्कडम म्हणतो मिच्छामी दुक्कडम || ३ ||
