क्षमा करावी सर्व चुकांची विसरूनिया अहम्
मिच्छामी दुक्कडम म्हणतो मिच्छामी दुक्कडम || धृ ||

ऑफिसमधील तणाव म्हणजे असतं समरांगण
खालच्यांवर अरेरावी करूनी वरच्यांशी भांडण
आज मात्र विसरा प्रमादास विसरूनी सर्व नियम
मिच्छामी दुक्कडम म्हणतो मिच्छामी दुक्कडम || १ ||

तणाव ऑफिसमधले घरातसुद्धा झिरपत जाती
शब्द वाकडा बोलून जातो विसरून सारी नाती
स्पष्ट क्षमा ही पत्नी मुलांची बोल नाही मोघम
मिच्छामी दुक्कडम म्हणतो मिच्छामी दुक्कडम || २ ||

मातपित्यांना चिंता वाटे किती झालो जरी मोठा
वेळ मोकळा खात जात असे वॄद्ध वयाने होता
सुटला असेल माझा बोलत असताना संयम
मिच्छामी दुक्कडम म्हणतो मिच्छामी दुक्कडम || ३ ||

आयुष्यात मिळाले मजला मित्र जीवाभावाचे
संगतीमध्ये ज्यांच्या विरले क्लेशही तणावाचे
चुकून कधी जर झाली असली त्यांच्या मना जखम
मिच्छामी दुक्कडम म्हणतो मिच्छामी दुक्कडम || ४ ||

दिनक्रमात ह्मा धकाधकीच्या किती व्यक्ती भेटती
खटके उडूनी कितीक त्यातील रागाने बोलती
शब्दाने वाढतो शब्द हो वातावरण गरम
मिच्छामी दुक्कडम म्हणतो मिच्छामी दुक्कडम || ५ ||

क्षमायाचना नसे प्रमादाचा पुढच्या परवाना
माझ्यातील दोषांची मजला जाणीव आहे जाणा
जाणीव असणे सुधारण्याची पायरी ही प्रथम
मिच्छामी दुक्कडम म्हणतो मिच्छामी दुक्कडम || ६ ||

क्षमा करावी सर्व चुकांची विसरूनिया अहम्
मिच्छामी दुक्कडम म्हणतो मिच्छामी दुक्कडम || धृ ||