दिवसभर असा
सोडला नाही वसा
संध्याकाळ झाली
खाल्लाच सामोसा

डाॅक्टर सांगतात मला
कमी करा वजन
यत्न केले पण
ताब्यात नाही मन || १ ||

एक आज तरी
लवकर ये ना घरी
सकाळी विनवणी
बायको माझी करी

संध्याकाळी प्यायला
बसलो मित्रगण
यत्न केले पण
ताब्यात नाही मन || २ ||

समोरची ती बार्इ
बघतसुद्धा नाही
माझी नजर मात्र
तिथेच सारखी जार्इ

सुंदर माझी पत्नी
जपते तन आणि मन
यत्न केले पण
ताब्यात नाही मन || ३ ||

मुलं गोंडस भारी
भेटतात पण रविवारी
बाकी ती बायकोचीच
सारी जबाबदारी

ऑफिसच्या कामाचं
नेहमीचंच दडपण
यत्न केले पण
ताब्यात नाही मन || ४ ||

आहे रक्तदाब
साधी नाही बाब
चिडचिड होते जरी
नसतो काही लाभ

रागावरती कसं
ठेऊ नियंत्रण
यत्न केले पण
ताब्यात नाही मन || ५ ||

डॉक्टर म्हणती थेट
इस्पितळातच भेट
तरीही खाली येऊन
पेटवली सिगरेट

आहे मोठा धोका
सांगती सर्वजण
यत्न केले पण
ताब्यात नाही मन || ६ ||

वॄद्ध वडील घरी
तब्येत नाही बरी
मन दुखावेल असं
बोललं जातं तरी

आर्इनंतर त्यांनीच
केलंय संगोपन
यत्न केले पण
ताब्यात नाही मन || ७ ||

मन वढाय वढाय
करू काय उपाय
वेसण घालीन म्हणतो
पण उधळतच ते जाय

चपळ आहे फार
निसटतं पटकन
यत्न केले पण
ताब्यात नाही मन || ८ ||