वाढली महागाई
किंमत वर जाई
बाप जेवला तर
उपास करते आई || १ ||

आई एक होती
मुलगी तिजला छोटी
मुलगा नाही म्हणून
हसू नाही ओठी || २ ||

ओठी धरली विडी
शिलगावायला काडी
चढण्याकरता सोय
यमसदनाची शिडी || ३ ||

शिडी आणि साप
परीक्षेचा व्याप
मुलं करतात मजा
टेंशन घेतो बाप || ४ ||

बाप झाला बेटा
बेटाही अभिनेता
दोघांच्या जोडीला
सिनेमात मग भेटा || ५ ||

भेटायाला येती
पाहुणचार घेती
पाकिस्तानी दूत
डोकेदुखी देती || ६ ||

देती ते उपदेश
भरपूर दाढी केश
कामं करती काळी
अंगी साधूचा वेष || ७ ||

वेष होता साधा
तयार पण अपराधा
रोखेल कैसे कोणी
सांगा दहशतवादा || ८ ||

वादावादी अहा
खाल्ल्या खाणी दहा
नैतिकतेचे वक्ते
सारे पक्ष पाहा || ९ ||

पाहा काय तो खेळ
खेळाडूंची भेळ
रोजच्या रोज पाहायला
असतो कोणा वेळ || १० ||

वेळ काय हो आली
मुलगी मुलीस म्हणाली
तुझ्याच नावाचे मी
कुंकू लावीन भाळी || ११ ||

भाळी लिहिली खाशी
प्रथमग्रासात माशी
प्रत्येकाचे प्राक्तन
सांगून जाती राशी || १२ ||

राशी त्या गोदामी
धान्याच्या कुचकामी
किमती वाढवण्याची
युक्ती आहे नामी || १३ ||

नामी आपुल्या करा
गाडी आणिक घरा
कर्ज देतो आम्ही
करून यावे त्वरा || १४ ||

त्वरा करा तुम्ही आता
शेअर्स वर जाता
पैसे लावाल तर
नाहीतर नुसत्या बाता || १५ ||

बाता नको फक्त
कमी असेल वक्त
एड्स किती बोकाळे
तपासून घ्या रक्त || १६ ||

रक्त कुणी तो काढे
कुणी कुणाला पाडे
कुठे कुठे भांडणे
कुठे होती अन् राडे || १७ ||

राड्यांतुन त्या बळे
कसे काय ना कळे
मीठ मिरची लावून
बनती मग ते मथळे || १८ ||

मथळे ते सारखेच
पडतो मजला पेच
तारीख बदलत जाते
छापत असतात तेच || १९ ||

तेच तेच वाचून
उबग येई साचून
तरीही करमत नाही
पेपराच्या वाचून || २० ||