आपण दोघे शेजारी, वाढलो एकत्र
मी मोठा, वयात काही दिवसांचाच फरक होता मात्र ||

अनेक तारखांत एक तारीख असते चमत्कारिक आणि सुरस
तुझ्यामुळे समजलं त्या तारखेला म्हणतात वाढदिवस ||

शाळेत इतरही तारखा समजू लागलं आपलं मन
सुट्टी असते, ज्या दिवशी असतात राष्ट्रीय सण ||

शाळेत मग आल्या भीतीदायक काही तारखा
चाचणी, सहामाही, वार्षिक परीक्षांचा रतीब सुरू झाला सारखा ||

कॉलेजात सबमिशनची तारीख म्हणजे अग्निपरीक्षा साक्षात
तू माझ्या आणि मी तुझ्या तारखा नियमित ठेवायचो लक्षात ||

आधी मी मग तू ज्या दिवशी प्रेमात पडलो त्या तारखांनी भरला रंग
त्यानंतर आधी माझा आणि मग तुझा प्रेमभंग ||

माझं लग्न ठरलं तर म्हणालास मला सोडून जातोयस साल्या
पण मग काही दिवसांत तुझ्याही लग्नाच्या पत्रिका छापून आल्या ||

आयुष्यात दुरावलो पुढे आणि आपले संबंध झाले मंद
पण जोपासला दोघांनी एकमेकांच्या तारखा लक्षात ठेवण्याचा छंद ||

त्या निमित्ताने तरी घालायचो एकमेकांना साद
फोन, इमेल, फेसबुक, व्हॉट्‌सॲप… कोणत्या तरी मार्गाने व्हायचा आपल्यात संवाद ||

मुलांनी विचारलं कोण होता तुमचा बेस्ट फ्रेंड – जिवलग मित्र
की डोळ्यांसमोर यायचं तुझंच चित्र ||

आणि … एक दिवस समजलं तू ह्मा जगातून निघून गेलास
साधा निरोप घ्यायचा चान्सही नाही दिलास ||

माझ्या आधी काहीतरी करण्याची एवढी कसली घार्इ
आता माझ्या मुलांच्या प्रश्नाला उत्तरच उरलं नाही ||

तुझ्या आठवणींचं काय करू, चिंता नाही केलीस जराशी
मागे ठेवून गेलास फक्त एक तारीख … नकोशी ||