कुठे जंगल हे घनदाट
कुठे उजाड शहरी थाट
खेटून एकमेकात
हे दोन्ही देश माझे ||

कुठे पुरात बुडती गावे
कुणी पाण्याकरता धावे
कुणी कसे काय सांगावे
हे दोन्ही देश माझे ||

कुठे कांदा भाकर जाडी
कुणी मेजवानीही झोडी
हो अन्नााची नासाडी
हे दोन्ही देश माझे ||

जीव घेती साधे आजार
कुठे लाखांचे उपचार
औषधांसाठी लाचार
हे दोन्ही देश माझे ||

कुणा शिक्षण पदव्युत्तर
कुणी अंगठा बहाद्दर
तरी जगणेच समांतर
हे दोन्ही देश माझे ||

कुणी कमवती कोटी कोटी
कुणा नोकरीही न छोटी
दरी वाढत जार्इ मोठी
हे दोन्ही देश माझे ||

कुठे टोलेजंग महाल
कुठे झोपडीतले हाल
वसे एकत्रच भवताल
हे दोन्ही देश माझे ||

काही खेळ कमविती अपार
बाकींना नाही आधार
कुणी सोसावा हा भार
हे दोन्ही देश माझे ||

नेते साठविती धन
त्यांना दूषण देती जन
तरी देती त्यांस आसन
हे दोन्ही देश माझे ||

जाती चंद्र मंगळावरी
घरी बाबांच्या तसबिरी
अंधश्रद्धा वसते उरी
हे दोन्ही देश माझे ||

परदेशाची स्वच्छता
डोळे दिपविते पाहता
लाज नाही पण थुंकता
हे दोन्ही देश माझे ||

गातो एकतेचे गुण सारे
पण धर्म जातही प्यारे
भिंती बांधून अडवू वारे
हे दोन्ही देश माझे ||

अशी अलभ्य ती संस्कृती
अन् फसविण्याची विकृती
दिसे प्रत्येकाची कृती
हे दोन्ही देश माझे ||