विचार करता समजून आला जो दगा झाला
माझ्या भरवशाच्या म्हशीला टोणगा झाला || धृ ||

रोज पाहायची मला
बसस्टॉपवर ती बाला
आज विचारू उद्या
म्हणता उशीर झाला

मला मामा म्हणणारा तिला पोरगा झाला
माझ्या भरवशाच्या म्हशीला टोणगा झाला || १ ||

लग्नाची मज घार्इ
स्थळ पाहाया जार्इ
आवडली जी मजला
ती निघे मुलीची तार्इ

सरता अंतरपाट घसा कोरडा झाला
माझ्या भरवशाच्या म्हशीला टोणगा झाला || २ ||

माझा तो प्रतिस्पर्धी
अक्कल त्याला अर्धी
साहेबाच्या पोरीशी
केली त्याने सलगी

मी करतोय काम साहेबाचा तो सगा झाला
माझ्या भरवशाच्या म्हशीला टोणगा झाला || ३ ||

नको सट्टा बाजार
असतो तो जुगार
ठाऊक तरीही एकदा
लावला पुरा पगार

पडलं पडलं मार्केट एकच ओरडा झाला
माझ्या भरवशाच्या म्हशीला टोणगा झाला || ४ ||

मुलगा माझा भला
अंगी चौसष्ट कला
बाबा झालो फेल
म्हणतो हसत मला

एकमेव कुलदीपक तो ही कोडगा झाला
माझ्या भरवशाच्या म्हशीला टोणगा झाला || ५ ||

सांगतात मेहनत कर
बाकी सारं विसर
स्वर्ग पाहण्याकरता
स्वत: आधी मर

सांगा नशिबावरती हा काय तोडगा झाला
माझ्या भरवशाच्या म्हशीला टोणगा झाला || ६ ||

विचार करता समजून आला जो दगा झाला
माझ्या भरवशाच्या म्हशीला टोणगा झाला || धृ ||