माझ्या मनात काही प्रश्न आहेत मोठे रास्त
उत्तर ज्यांचं मिळणं मोठं झालंय दुरापास्त || धृ ||

विडी सिगारेट आरोग्याला अपायकारक फार
कानीकपाळी ओरडून सांगे आपल्याला सरकार
तंबाखूचा उद्यम कैसा चाले मग निर्धास्त
उत्तर ज्याचं मिळणं मोठं झालंय दुरापास्त || १ ||

व्हॉटस्‌ॲपवरती वाद झाला बदलून गेलं चित्र
नाव टाकलं दोघांनी जे काल होते मित्र
वादाचं ते कारण मैत्रीहून मोठं का भासतं
उत्तर ज्याचं मिळणं मोठं झालंय दुरापास्त || २ ||

झोपडीवाला घर मागतो घरवाला बंगला
माझा पगार माझ्यासाठी कधीच नसतो चांगला
प्रत्येकाला वाटतं नशीब माझ्यावर का रूसतं
उत्तर ज्याचं मिळणं मोठं झालंय दुरापास्त || ३ ||

निवडणूकीला नेता विवरण संपत्तीचे धाडे
दरवेळी त्याची संपत्ती दुप्पट तिप्पट वाढे
आयकर खात्याला सारं ते कायदेशीर का दिसतं
उत्तर ज्याचं मिळणं मोठं झालंय दुरापास्त || ४ ||

राजेशाहीपेक्षा म्हणतात चांगली लोकशाही
राजे गेले लोक आले काही बदललं नाही
जनसेवक राजकारण्यांची अशी कशी बडदास्त
उत्तर ज्याचं मिळणं मोठं झालंय दुरापास्त || ५ ||

चोरलेला तो कोहिनूर त्यांना वाटत नाही लाज
वर आपल्याला शिकवतायत शहाणपणा ते आज
उलट्या बोंबा मारतो कैसा चोर तो बिनधास्त
उत्तर ज्याचं मिळणं मोठं झालंय दुरापास्त || ६ ||

कार्य राष्ट्रसंघाचं असतं विश्वशांततेबद्दल
पाच देश कायमचे तेथे मारून बसले फतकल
त्यांचा शस्त्रांचा धंदा कैसा सर्वांहून जास्त
उत्तर ज्याचं मिळणं मोठं झालंय दुरापास्त || ७ ||

साऱ्या धर्मांचा स्वतंत्र तो र्इश्वर असे महान
सर्व माणसे बालक त्याची त्याच्यापुढे समान
धर्माधर्मातील वैराने जीवन तरी का नासतं
उत्तर ज्याचं मिळणं मोठं झालंय दुरापास्त || ८ ||

एक नाही दोन नाही प्रश्न पडतात सत्तर
मूग गिळून बसतात ज्यांच्याकडे असतं उत्तर
जग चालतंय मी का ह्मा प्रश्नांनी होतोय त्रस्त
पण ह्मा प्रश्नाचं उत्तर देखील झालंय दुरापास्त || ९ ||

माझ्या मनात काही प्रश्न आहेत मोठे रास्त
उत्तर ज्यांचं मिळणं मोठं झालंय दुरापास्त || धृ ||