पुन्हा उत्सव आज
बटबटीत तो बाज
कानांवरच्या हातांमधुनी ठणठणतो आवाज

रस्त्यामध्ये मांडव
दिवसरात्रीचे तांडव
रांगा लावून दर्शन घेती पंचक्रोशीतील बांधव

माझा सोडून प्रत्येकाचा चेहरा आहे हसरा
माझ्या देशामध्ये कसा हा मीच जाहलो उपरा || १ ||

थुंकतो कुणी थेट
फेके कुणी सिगरेट
कचरा करण्यासाठी लावला सार्‍यांनी जणू नेट

घाण पुढे अन् पश्च
नाक धरावे गच्च
साबण लावून स्नान करावे तरी वाटे अस्वच्छ

बाकी सारे मजेत केवळ मलाच दिसतो कचरा
माझ्या देशामध्ये कसा हा मीच जाहलो उपरा || २ ||

सांगतो कुणी जात
कुणी धर्माची बात
कुणी राहतो भाषा प्रांतांच्या भिंतींच्या आत

कुणी पत्नीला छळे
कुणी छेडी मुलींना बळे
कुणी आपुल्या कन्यांचे गर्भात कापतो गळे

परंपरांच्या पडद्याखाली म्हणती विवेक विसरा
माझ्या देशामध्ये कसा हा मीच जाहलो उपरा || ३ ||

सगळे देती लाच
सगळे खाती लाच
नियम तोडणे प्रत्येकाने छंद जोडिला हाच

उद्योग आणि शेती
सारे लुटुनी नेती
मते जिंकुनी जनतेची तरी पुन्हा निवडुनी येती

मणी सर्व एका माळेचे कुणीच नाही दुसरा
माझ्या देशामध्ये कसा हा मीच जाहलो उपरा || ४ ||

इथे जन्म जाहला
पैसाही मिळवला
देशाच्या प्रगतीचा मोठा लाभ मिळाला मला

परदेशी मी जार्इ
पाहून तेथील सोयी
परतून येता वाटे मी अडकलो कोणत्या डोही

कसा लपावा स्वार्थी माझ्या भाव मनीचा दुखरा
माझ्या देशामध्ये कसा हा मीच जाहलो उपरा || ५ ||

आवडे जे बहुजना
वाटे मजला घृणा
मीच शहाणा तुच्छ बाकीचे करून घेर्इ धारणा

माझा वर्ग विशेष
उच्च राहणी वेश
देशामध्ये जणू जाहले दोन निराळे देश

देश बदलेल माझ्यासाठी सुदिन जाणीन खरा
माझ्या देशामध्ये कसा हा मीच जाहलो उपरा || ६ ||