दिवस असो वा रात्र असो तो काम करतसे भला
जाता येता नियमित माझी छबी दाखवी मला
माझ्या आयुष्याचा तंतोतंत असा तो ठसा
कुण्या समांतर जगतामध्ये नेर्इ मला आरसा || १ ||

आरशातल्या माझे असते खचितच न्यारे घर
पदर साडीचा पत्नी घेते उलट्या खांद्यावर
माझ्या तुलनेमध्ये त्याचा भांग उलट तो कसा
कुण्या समांतर जगतामध्ये नेर्इ मला आरसा || २ ||

आरशातल्या जगतामध्ये गोष्ट प्रत्येक उलटी
सचिन खेळतो लेफ्टी तेथे लारा पण राइटी
पश्चिम खिडकीमध्ये येतो सकाळचा कवडसा
कुण्या समांतर जगतामध्ये नेर्इ मला आरसा || ३ ||

घड्याळातले पहा तेथल्या उलटे फिरती काटे
फोटोमध्ये आर्इवडिलांची अदलाबदली होते
कडक गणपती उजव्या सोंडेचाही दिसे छानसा
कुण्या समांतर जगतामध्ये नेर्इ मला आरसा || ४ ||

आरशातला तो मी असतो पठ्ठा रूबाबदार
पोट आत अन् छाती दुप्पट डोळे पाणीदार
पक्का इडियट मला म्हणे तो बच्चन येऊन जसा
कुण्या समांतर जगतामध्ये नेर्इ मला आरसा || ५ ||

आरशामधील मी माझा तो मित्र जवळचा खूप
विचार समजून घेतो माझ्या मनातले गुपचूप
गुपिते माझी लपवून ठेवी जणू घेतला वसा
कुण्या समांतर जगतामध्ये नेर्इ मला आरसा || ६ ||

आरशातल्या माझ्यामध्ये दिसे मज अंतरंग
शरीर दाखवी तसे दाखवी मनाचेही तो ढंग
अस्तित्वाची साक्ष मनाला पटवून देतो असा
कुण्या समांतर जगतामध्ये नेर्इ मला आरसा || ७ ||

आरशातल्या माझी काही दु:खे असतील काय
त्यालाही ती वाटून घ्यावी वाटत नसेल काय
मन अपुले मोकळे कधीही करत नाही तो तसा
कुण्या समांतर जगतामध्ये नेर्इ मला आरसा || ८ ||