कठीण प्रसंगी नशा करावी असते समजूत भोळी
प्रत्येकाची अशा प्रसंगी असे अफूची गोळी || धृ ||

बालपणातच ठरून जात असे आयुष्याचा पाया
कडकपणाने बापाच्या जातसे पुत्र तो वाया
बापापुढती नेहेमी त्याला पाठीशी घातले
चूक वागणे ठाऊक तरीही आड येतसे माया

आर्इच्या त्या मायेकरता पुरली कुठली झोळी
पुत्रप्रेम आर्इकरता अन् असे अफूची गोळी || १ ||

नवे वर्ष हे आपुल्याकरता आहे फार कठीण
येतील आव्हाने तुमच्या सामोरी नवीन नवीन
कर्मचारी आपुले पण सार्‍या देशी सर्वोत्तम
सांगावे किती काम तयांना येतच नाही शीण

हरेक मॅनेजर सांगे दर वर्षी अशाच ओळी
काम कर्मचा-यांकरता ती असे अफूची गोळी || २ ||

ऑफिसाचे काम सारखे करूनी पुरता थकलो
गरजा घरच्या भागविताना ओझ्याने वाकलो
येर्इ बातमी विश्वचषक जिंकून आपण आणला
तेव्हा वाटे मर्दुमकीने स्वत:च जग जिंकलो

विजयाचा तो स्वाद अंतरी किती दिवस मग घोळी
क्रिकेट मध्यमवर्गीयांकडे असे अफूची गोळी || ३ ||

रात्रंदिन मरमरूनी चांंगला खूप कमवला पैसा
पत्नी म्हणे घरी नसशी आपुला असला प्रपंच कैसा
तिला दिले दागिने मुलांना कपडेलत्ते भारी
केली वल्गना प्रेमळ तुमचा बाप पाहा हा ऐसा

बने विस्तवावरी धनाच्या भावनांचीही पोळी
पैसा हा नवश्रीमंतांना असे अफूची गोळी || ४ ||

महागार्इ वाढली पडे अन् सुविधांचा दुष्काळ
गरिबी हटाव घोषणांचीही नाही शिजली डाळ
धार्मिक भावभावनांना मग घालावे खतपाणी
मी मंदिर पाडतो आणि तू मशीद कुणाची जाळ

गरिबी विसरून परस्परांची करती राखरांगोळी
जनतेकरता धर्म जात ही असे अफूची गोळी || ५ ||

करून पाहिले धर्मकारणही नाही फायदा झाला
सत्तेच्या पायावर आला जनक्षोभाने घाला
अशा वेळी देऊन नव्याने देशभक्तीला साद
झोकून देशाला समरी मग सत्तापालट टाळा

नागरिक मग उठतील घेण्या छातीवरती गोळी
देशप्रेम हे जगी कुठेही असे अफूची गोळी || ६ ||

कठीण प्रसंगी नशा करावी असते समजूत भोळी
प्रत्येकाची अशा प्रसंगी असे अफूची गोळी || धृ ||