उशीर जाहला करताना दाढी ।
चुकली गाडी चॉकलेट खावे ॥
कधी ऑफिसला येता लवकर ।
आणुनी रुचकर चॉकलेट खावे ॥ १ ॥

बॉस जाचतो कामाचा भार ।
कुठलाही वार चॉकलेट खावे ॥
होई कौतुक वाढे पगार ।
फेडुनी उधार चॉकलेट खावे ॥ २ ॥

असेल घरी पत्नी कजाग ।
रिचवुनी राग चॉकलेट खावे ॥
पत्नी प्रेमळ रंगली रंगे ।
तिच्याच संगे चॉकलेट खावे ॥ ३ ॥

मुले खट्याळ अभ्यास नाही ।
अंगाची लाही चॉकलेट खावे ॥
मुलांच्या करिता घरी आणुनी ।
हळू चोरुनी चॉकलेट खावे ॥ ४ ॥

खर्च वाढले धन चणचण ।
खर्चुनी पण चॉकलेट खावे ॥
अशी अवचित लागे लॉटरी ।
करण्या साजरी चॉकलेट खावे ॥ ५ ॥

कुठलाही खेळ भारत हरता ।
मॅच सरता चॉकलेट खावे ॥
खेळी कोणत्या जिंके भारत ।
नाच करत चॉकलेट खावे ॥ ६ ॥

जाई आजारी तोंडाची चव ।
करिता आर्जव चॉकलेट खावे ॥
आजार जाता तोंडाला चव ।
नको आर्जव चॉकलेट खावे ॥ ७ ॥

वाढे वजन करा उपास ।
पण झकास चॉकलेट खावे ॥
वजन घटता मनी संतोष ।
करुनी जल्लोष चॉकलेट खावे ॥ ८ ॥

वय जाहले बाल्य आठवे ।
मुलांच्या सवे चॉकलेट खावे ॥
वयाचे काय आकड्यांचा खेळ ।
मिळता वेळ चॉकलेट खावे ॥ ९ ॥

जीवन खडतर मनात चिंता ।
सोडविण्या गुंता चॉकलेट खावे ॥
जीवन सुंदर मिळे एकदा ।
सदासर्वदा चॉकलेट खावे ॥ १० ॥

काही कारण मिळते जेव्हा ।
आणुनी तेव्हा चॉकलेट खावे ॥
मिळत नाही कारण जेव्हा ।
आणुनी तेव्हा चॉकलेट खावे ॥ ११ ॥

मध्यमवर्गीयाला जग दबंग ।
लिहुनी अभंग चॉकलेट खावे ॥
जग असू दे नको वादंग ।
लिहुनी अभंग चॉकलेट खावे ॥ १२ ॥