तुम्हाला हल्ली मोकळा वेळ मिळतो का?

अंहं … रात्री झोपण्यापूर्वी मोजून मापून फोन आणि टीवी बघायला मिळणारा नव्हे
शनिवार रविवारी घरच्या कामाकरता मिळणारा नव्हे
वर्षातून एकदा सुट्टी घेऊन
पहाटे पाच वाजता उठायला लावणाऱ्या कण्डक्टेड टूर्समध्ये मिळणारा … तोही नव्हे

मोकळा म्हणजे खरोखर मोकळा
लहानपणी मुंग्यांची रांग बघण्याकरता मिळायचा … तसा
शाळेत उन्हाळ्याच्या सुट्टीत
वाळत घातलेल्या पापडांची राखण करताना मिळायचा … तसा
कॉलेजच्या दिवसांत स्टेशनवरून घरी रमत गमत पायी येताना मिळायचा … तसा

सतत भुंगा … काय करत होतो, काय करतोय, काय करायचं आहे
केव्हा केव्हापासून केव्हापर्यंत
एक मालगाडी … न संपणारी
दोन डब्यांच्या फटीतून दिसणारं पलीकडचं दॄष्य
लक्षात येण्यापूर्वीच पुढचा डबा …

कधी घराच्या खिडकीतून आकाशातील ढग पाहिले आहेत?
कधी घरात जमिनीवर लोळत सीलिंगवरची जळमटं पाहिली आहेत?
कधी आपल्याच मळहातावरच्या केसांची रचना पाहिली आहे?

वेळेचा पिझ्झा … वाटून दिलेला
कुटुंब ऑफिस मित्र घरची कामं करमणुक प्रवास …
तुकडे … काही लहान तर काही मोठे
दोन त्रिकोणांमध्ये पडलेला चुरा … मोकळा वेळ!

वेळेची परिमाणं … दिवस महिने वर्षं वाढत गेले
आणि वेळ मात्र हरवून गेला … सुखात यशात पैशात