दोन खांबांवर आडवा फलक, लांबून दिसत असे प्रवेशद्वार
चार मजली होती तरी ती इमारत होती मोठी टुमदार ॥

प्रयोगशाळा, वाचनालयं, बाक आणि फळे ठेवलेले वर्ग
शाळा कसली तो तर होता मुलांकरता स्वर्ग ॥

शाळेच्या पुढ्यात एक मोठं अंगण होतं पसरलेलं लांबच लांब
अंगणाच्या मध्यभागी चौथऱ्यावर होता एक उंचच उंच खांब ॥

खुलून दिसत होता इमारतीला दिलेला रंग पांढरा आणि निळा
डोळे भरून बघत होतो दिमाखदार अशी ती माझी शाळा ॥

दोन वर्षांपूर्वी आलो तेव्हा इथे होतं नुसतं माळरान
झाडंझुडूपं तोडून आम्ही इथेच बांधली एक झोपडी लहान ॥

सहा वर्षांचा होतो बहुतेक जेव्हा पहिल्यांदा इथेच घेतलं खांद्यावर छोटं पोतं
आईने मोठ्या कौतुकाने मोडली होती कानशिलावर बोटं ॥

आता रोज काम करतो त्याचं कुणी करत नाही कौतुक
मलाही कळलंय काम केलं नाही तर शमेल कशी पोटाची ह्या भूक ॥

माझ्या शाळेकरता केलंय दोन वर्षं काम मी रग्गड
प्रत्येक मजल्यावर माझ्या हाताने लावलेला एक तरी असेल दगड ॥

इथे मुलं नक्की काय करणार मी विचार करत असे रात्री
पण काहीतरी छान असणार मला नक्की होती खातरी ॥

कालच काढल्या झोपड्या आणि स्वच्छ केली घाण
आमच्या झोपड्या काढल्यावर माझी शाळा दिसणार होती जास्त छान ॥

आज शाळा उघडणार होती जमली होती गर्दी
सगळ्यांबरोबर मलाही मिळाली होती एक बर्फी अर्धी ॥

संसार खांद्यावर टाकून आम्ही निघालो होतो पुढच्या गावी
समोरून शाळेत येणाऱ्या मुलांच्या खांद्यावर होते खाऊचे डबे आणि दप्तरं नवी ॥

एक रंगीबेरंगी कापड फडकत होतं त्या माझ्या शाळेच्या अंगणातील उंच खांबावर
मला काय त्याचं, मला पुढल्या गावी जाऊन बांधायचं आहे माझं एक टोलेजंग घर ॥