पूजा सारे करत मुल हवं असेल तर
ग्रीसमधील देवीचं त्या नाव डेमिटर
ओलांडायची नसेल जर का जीवनाची वेस
साकडं घालत मृत्यूचा होता देव हॅडेस
देवांचाही राजा होता झिअस ज्याचं नाव
उपासनेच्या शर्यतीत मोठं त्याचं नाव
सण साजरे करत होते भक्तीभावे सहर्ष
संस्कृती ती अस्तित्वात होती सहाशे वर्षं
रोमन सत्ता नंतर आवळे असा भयंकर पाश
बघता बघता होऊन गेला संस्कृतीचा विनाश
संस्कृतीची जेव्हा सारी लयास गेली ठेव
कुठे गेले असतील सारे बलाढ्य त्यांचे देव? ॥ १ ॥

तेरा देव मिळून बनवती मनुष्याची जात
माया संस्कृतीचे लोक स्तुती त्यांची गात
विश्वनिर्मिती करतो त्यांचा देव गुकुमाझ
अमेरिका खंडात त्याचा दुमदुमला आवाज
प्रसन्न ठेवा मृत्यूचा तो देव आह पक
मृत्यूनंतर गाठाल नाहीतर झिबल्बा नरक
अमेरिकेत फोफावली ती संस्कृती चिकार
थोडीथोडकी नाहीत चांगली वर्षं अडीच हजार
स्पेनमधून आले सैनिक बंदूका आणि घोडे
बघता बघता उरले लोक शतांशाहून थोडे
लुप्त झाले फुटता तेथे आक्रमकांचं पेव
कुठे गेले असतील सारे बलाढ्य त्यांचे देव? ॥ २ ॥

समुद्रातून जग बनवती ऑग्डोड देव आठ
इजिप्तमधले एकूण देव सतराशे अन् साठ
काम करत होता देव त्यांचाही दिनरात
प्रतिपालक तो जगाचा नाव त्याचं मात
सर्वात जास्त उपासनेला पात्र देवी इसिस
मृत्यूचाही देव होता त्यांचा तो अनुबिस
दिडशे पिढ्या चालला होता इजिप्तचा कारभार
अस्तित्वात संस्कृती ती वर्षं तीन हजार
सतत परक्या आक्रमणांनी अशी जर्जर केली
नाईलच्याच पाण्यासंगे जशी वाहून गेली
कधी काळी जगात ज्यांचं स्थान एकमेव
कुठे गेले असतील सारे बलाढ्य त्यांचे देव? ॥ ३ ॥

आजही आहे संस्कृती अन् आजही चाले पूजा
आजही म्हणती आमचाच देव नाही कोणी दुजा
सारे म्हणती एकच देव रूपं त्याची अनेक
देवाचंच नाव घेऊन चाले पण अतिरेक
मनीच्या वाईट प्रवृत्तींना घालण्याला लगाम
देव बनवतो आपण त्याचे बनतो पण गुलाम
मानून चाला देवच असतो कायम संगतीला
माणूस बनूनच यावं लागतं त्याला मदतीला
माणसापेक्षा जास्त देती देवाला महत्त्व
माणसावर अवलंबून असतं देवाचं अस्तित्व
कणखर मनी शोभे ती देवाची उठाठेव
दुबळ्या मनात राहील कसा बलाढ्य तुमचा देव? ॥ ४ ॥