देव असावा असा सूर्यकिरण सोनेरी
दिवसाच्या आरंभी उमेद मनी जो पेरी || १ ||

देव असावा असा नितळ काच आरसा
माझ्यातील तेजाचा दावी मला कवडसा || २ ||

देव असावा असा सकाळची न्याहारी
दिनभरच्या कामाची मिळेल उर्जा सारी || ३ ||

देव असावा असा जशी वाट ती लांब
मार्गी त्या लागता कुणी न म्हणते थांब || ४ ||

देव असावा असा आसमंत ते निळे
जगी कुठेही जावे त्याचे छप्पर मिळे || ५ ||

देव असावा असा पक्वान्नाचे ताट
पाहून भरते पोट नको बसाया पाट || ६ ||

देव असावा असा वार्‍याची जणू झुळूक
उष्ण मनातील जागा करतो शांत अचूक || ७ ||

देव असावा असा मोठी जशी बहीण
रडू आपुले ऐकाया येर्इ न तिजला शीण || ८ ||

देव असावा असा जसा जवळचा सखा
धावून ये मदतीला अपाय झाला नखा || ९ ||

देव असावा असा जसा मुलीचा पिता
खंबीर मनी ओलावा कधी न होर्इ रिता || १० ||

देव असावा असा कपाशीचे ते वस्त्र
शोषून घेर्इल माझ्या विपदा जो सहस्र || ११ ||

देव असावा असा आजीची ती गोष्ट
निजता निजता ऐसे विसरूनी जाती कष्ट || १२ ||

देव असावा असा रातीचा कंदील
काळोखाची भीती त्याचमुळे जार्इल || १३ ||