काल माझ्या घरी आल्या मैत्रिणी चिकार
खूप पसारा केला आणि झाल्या मग पसार
आवर पसारा म्हंटलं म्हणजे येतो मजला शीण
आमच्या घरी आहे आर्इ नावाचं मशीन || १ ||

सतत सुरू असते घरी माझी फर्मार्इश
आज चिकन बनव उद्या बनव स्वीटडीश
परवा बनव आइसक्रीम मग काय हवं आणखीन
आमच्या घरी आहे आर्इ नावाचं मशीन || २ ||

रविवारी रात्री काम आठवतं येतं मजला रडू
क्राफ्टचं सामान सापडत नाही कुठे जाऊन दडू
सकाळी उठून बघते बॅगेत कागद कात्री पिन
आमच्या घरी आहे आर्इ नावाचं मशीन || ३ ||

अभ्यासाच्याकरता मला तीच जवळ लागते
आजारी मी पडले तर ती रात्रभर जागते
रोज रात्री सांगते मजला गोष्टी नवीन नवीन
आमच्या घरी आहे आर्इ नावाचं मशीन || ४ ||

मला नेहमी ताजं देऊन शिळं स्वत: खाते
घरची कामं कमी म्हणून का बाहेर पण ती जाते
बाबा म्हणतात तिच्याशिवाय घर चालणं रे कठीण
आमच्या घरी आहे आर्इ नावाचं मशीन || ५ ||

माझ्याआधी उठते आणि माझ्यानंतर झोपते
घरामधल्या सगळ्यांसाठी खप खप खपते
इतकं काम करते जणू बाटलीमधला जीन
आमच्या घरी आहे आर्इ नावाचं मशीन || ६ ||

अशा आमच्या मशीनमध्ये एकदा बिघाड झाला
कधी नव्हे तो माझ्या आर्इस ताप तेव्हा आला
झोपून रहावं लागलं तिला दिवस पुढचे तीन
आमच्या घरी आहे आर्इ नावाचं मशीन || ७ ||

तीन दिवसांनी डाॅक्टर म्हणती अजून आराम करा
आर्इ म्हणते आराम कसला झाला आजार बरा
चौथ्या दिवशी सुरू झालं नेहमीचं रूटीन
आमच्या घरी आहे आर्इ नावाचं मशीन || ८ ||

असं आहे मशीन आमचं एकदम मल्टीपर्पज
चालतं कसं अथक आली आहे मजला समज
आमचं प्रेमच इंधन तिचं नेहमी तिजला देर्इन
आमच्या घरी आहे आर्इ नावाचं मशीन || ९ ||