प्रेमात पडल्यावर काय होतं ?

प्रेमात पडल्यावर माणूस होतो आशावान
कधीतरी घायाळ करेल तिच्या नजरेचा बाण
मी वाटेतून जाताना तिची हाक येईल ऐकू
त्या तिच्या हाकेकडे त्याचा सतत असतो कान ॥

प्रेमात पडल्यावर काय होतं ?

प्रेमात पडल्यावर माणसाचं होतं गाढव
कधी केस तर कधी दाढी वाढव
समजतच नाही मित्र काय बोलतायत ते
आणि समजलं तर सुरू होतं त्याचं अकांडतांडव ॥

प्रेमात पडल्यावर काय होतं ?

प्रेमात पडल्यावर माणूस होतो आंधळा
फडतुस चित्रपटांना रडतो काढून गळा
भिंतीकडे पाहात गाऊ लागतो गाणी
माझ्या पिरतीचं पाणी आणि तुझा ज्वानीचा मळा ॥

प्रेमात पडल्यावर काय होतं ?

प्रेमात पडल्यावर माणूस होतो मुका
पुस्तकाच्या एकाच पानाकडे बघत बसतो फुका
काहीही विचारलं तर तोंडातून शब्द फुटत नाही
अभ्यासात आणि ऑफिसच्या कामात करू लागतो चुका ॥

प्रेमात पडल्यावर काय होतं ?

प्रेमात पडल्यावर माणूस होतो बहिरा
फरक पडत नाही मागे लावा कितीही ससेमिरा
मूर्ख हास्य तोंडावर ठेवून बसतो
मग भले त्याला मारा किंवा उभा चिरा ॥

प्रेमात पडल्यावर काय होतं ?

प्रेमात पडल्यावर माणसाचा होतो महानायक
शक्य वाटू लागतात भलत्याच गोष्टी अचानक
पंधरा गुंड समोर आले तरी बेहत्तर
आणि त्यातला प्रत्येक गुंड असो कितीही भयानक ॥

प्रेमात पडल्यावर काय होतं ?

प्रेमात पडल्यावर माणूस होतो खर्चिक
महिन्याभरात संपतं बजेट त्याचं वार्षिक
दुकानं होतात बंद आणि मित्र लागतात टाळू
कोसळतं त्याच्यावर घोर संकट आर्थिक ॥

प्रेमात पडल्यावर काय होतं ?

प्रेमात पडल्यावर माणसाचं होतं कल्याण
दु:ख वेदना ह्यांचं विसरलं जातं भान
चिंचेच्या झाडाचा होतो चिनार वृक्ष
आणि बसस्टॉप वाटू लागतो रम्य परीसर छान ॥

प्रेमात पडल्यावर काय होतं ?

प्रेमात पडल्यावरच पण माणूस येतो माणसात
जगण्याचा अर्थ सापडतो त्याला निमिषार्धात
आजूबाजूचे लोक त्याला चिडवू द्यात भले
पण प्रत्येकाला आपल्या प्रेमाचे दिवस आठवू लागतात ॥