एके दुणे त्रिक चोक पाचा सक साता
पाढा तिच्या नावाचा मी म्हणतोय येता जाता ॥ धृ ॥

एक दिवस करायचाय गं नक्की तुला फोन
विचाराने कावरेबावरे डोळे माझे दोन
एके दुणे त्रिक चोक पाचा सक साता
आवाज तुझा ऐकल्याशिवाय करमत नाही आता ॥ १ ॥

तीन मैत्रिणी म्हणती भेटला नाहीस दिवस फार
चल पिक्चरला जाऊ म्हणतात मित्र माझे चार
एके दुणे त्रिक चोक पाचा सक साता
आता इतर कोणाच्याच आवडत नाहीत बाता ॥ २ ॥

पाच देव पूजतोय भेट व्हावी म्हणून पाहा
कॉलेजमध्ये वाट पाहातो तुझी तास सहा
एके दुणे त्रिक चोक पाचा सक साता
झालंय काय काळजीत पडले माझे पिता माता ॥ ३ ॥

सात दिवस पडली नाही तुझी माझी गाठ
अंधारून गेल्या माझ्या दिशा जशा आठ
एके दुणे त्रिक चोक पाचा सक साता
नाकात गेला चमचा माझा ब्रेकफास्ट खाता खाता ॥ ४ ॥

नऊ आले नाकी गोड लागत नाही चहा
विसरून गेलो पाढा जेव्हा दिवस झाले दहा
एके दुणे त्रिक चोक पाचा सक साता
दुसरा पाढा सुरू झाला पहिला संपून जाता ॥ ५ ॥

एके दुणे त्रिक चोक पाचा सक साता
पाढा तिच्या नावाचा मी म्हणतोय येता जाता ॥ धृ ॥