तुला पहिल्या प्रथम पाहिलं तेव्हा मन म्हणालं हीच ती
बहुदा अशीच बनत असावीत जन्मजन्मांची नाती
वाट पहायचो वेड्यासारखा कधी होर्इल आपली पुढची भेट
तुझं भरभरून बोलणं, खळखळून हसणं भिडून जायचं काळजाला थेट
आपल्यात पुरूषांनीच घ्यायचा असतो म्हणे पुढाकार
म्हणून विचारून टाकलं एक दिवस म्हंटलं होऊन जाऊ दे आर या पार
चेहरा पडाला तुझा आमचं जहाज पार नाही आरच राहिलं
हळू आवाजात म्हणालीस तुला ‘तशा’ नजरेने कधीच नाही पाहिलं
थिजून गेल्या साऱ्या होत्या इच्छा माझ्या मनी दहा
तरी एकच इच्छा मनात आहे जीवनात तू सुखी रहा || १ ||

मिळेल तुला… कदाचित मिळालाही असेल तुझ्या स्वप्नातला राजकुमार
विचार जरी मनात आला तरी त्रास होतो फार
आयुष्य सुरूच राहातं, माझ्याहीकरता ते थांबणार नाही एवढं नक्की
मलाही कोणी मिळेल ही गोष्ट मला ठाऊक आहे पक्की
मित्र मारतील कोपरखळ्या, समजेल मला त्यांच्या बोलण्यातील खोच
हसण्यावरी नेर्इन सारं पण मनात नक्कीच राहील एक बोच
खरं सांगतो तुला, तुझ्याशी बोलूच शकत नाही मी खोटं
पण तुझा दुस्वास करावा एवढं माझं मन नाही कोतं
आत्ता तरी वाटतंय तुझ्यावाचून जगणं कठीण महा
तरी एकच इच्छा मनात आहे जीवनात तू सुखी रहा || २ ||

नकार दिलास तू आणि आपल्यातला मोकळेपणा संपला
जोर लावून उघडला की जसा दुभंगून जातो शिंपला
भेटी संपल्या आपल्या… काही कारणच नव्हतं मिळत
आणि खरं सांगू? कारण मिळालं तरी भेटायचं मीच होतो टाळत
आज मला विचारते आहेस का वागतोयस असा वेड लागल्यासारखा
एवढा जवळचा मित्र माझा असा कसा झालास पारखा
आज शेवटचं सांगून टाकतो ह्मा मैत्रीचा कंटाळा आलाय मलाही
कारण तुला कधी ‘तशा’ नजरेनं मी मुळी पाहिलंच नाही
शेवटची ही भेट आपली निक्षून तुला सांगतोय पहा
पण तरीही… एकच इच्छा मनात आहे जीवनात तू सुखी रहा || ३ ||