तुझ्या शेजारची ती माल
कटाक्षानेच व्हायचे माझे हाल
शीळ घातली तर तू चिडायचास
पण लाल व्हायचे तिचे गाल

ओळख करून दे म्हंटलं तर फेकून मारलीस वही
तू घाबरलास
तेव्हा तुला मी म्हटलं होतं हाय कंबख्त तू ने तो कभी पी ही नही || १ ||

कॉलेजातली प्रोफेसर चारू
होती भलतीच मारू
गेलो तिला रोज द्यायला
तर पहात होतास मला धरू

ती माझ्याशी हसून बोलली तर व्हायचं तुझं दही
तू लाजायचास
तेव्हाही मी म्हणायचो हाय कंबख्त तू ने तो कभी पी ही नही || २ ||

लागली नोकरी संपलं शिक्षण
माझी प्रेमासाठी तुझी पैशासाठी वणवण
म्हणायचास भविष्याचा विचार कर
ह्मावर किती भांडायचो आपण

तुला मोठे हुद्दे तर प्रेयसींची यादी माझ्या संग्रही
तुला कधीच नाही समजलं
तेव्हाही मी म्हणायचो हाय कंबख्त तू ने तो कभी पी ही नही || ३ ||

आधी तुझं झालं लग्न
संसारात झालास तू मग्न
कुत्सित हसायचास मला
पण माझंही लग्न झालंच मागनं

परधर्मीय होती ती म्हणून आला नाहीस लग्नासही
तुला समाज आड आला
तेव्हाही मी म्हणालो होतो हाय कंबख्त तू ने तो कभी पी ही नही || ४ ||

तुमचं कधीच झालं नाही भांडण
आमच्या घरात माजायचं रण
तुझी बायको सती सावित्री
आमच्याकडे सतत रागावून माहेरपण

दर वेळी आणायचो परत असेल ती कितीही निग्रही
तुला अजब वाटेल
कारण म्हंटलं ना तुला की हाय कंबख्त तू ने तो कभी पी ही नही || ५ ||

प्रेमात हरण्याची तुला भीती
म्हणून प्रेमात पडण्याचीच तुला भीती
भांडणाच्या फोडणीनेच होतं प्रेम खमंग
प्रेमाची ओंजळ तुझी नेहमीच राहील रीती

जाणतो मी ती किती तळमळते नेहमी माझ्या विरही
अरे तू क्या जाने
मी म्हणतो तेच खरं की हाय कंबख्त तू ने तो कभी पी ही नही || ६ ||

पितात त्यांनाच कळतं नशा काय असते
पिऊन धडपडण्यातही मजा काय असते
मसाल्याचं दूध पिऊन कसं तुला कळणार
प्रेमात फटकारणा-यांची अदा काय असते

आयुष्यभर मैत्री केलीस तरी हे समजला नाहीस अजूनही
अरे सोड ना रे
म्हणूनच आजही म्हणतो की हाय कंबख्त तू ने तो कभी पी ही नही || ७ ||