वळण आलं वाटेमध्ये सरळ जाणार नाहीस ना
तेव्हा माझा हात सोडून दूर जाणार नाहीस ना

कर्ता आहे मी ह्मा घरचा माझ्या इच्छा माझे निर्णय
छायेत माझ्या राहून तू कोमेजून जाणार नाहीस ना

माझ्याकरता नावसुद्धा आपलं मागे सोडून आलीस
माझं लाडकं तुझं ‘मी’पण विसरून जाणार नाहीस ना

मनाच्या ह्मा तारूकरता तुझं असणं दीपस्तंभ
परत येण्या निघालो तर विझून जाणार नाहीस ना

आव आणतो पौरूष्याचा तुला आधार देण्यासाठी
मला आधार लागेल तेव्हा खचून जाणार नाहीस ना

घराबाहेर पडलो असता मोहाची सारी दुनिया ती
प्रमाद माझे सारे सहन करत जाणार नाहीस ना

निकड भासते पदोपदी मज नसते जेव्हा सानिध्य
मला उगाच स्वावलंबी करून जाणार नाहीस ना

माझ्या कर्तुत्त्वाच्या मागे खंबीर मूर्ती तुझी असे
संधी तुलाही मिळेल तेव्हा कच खाणार नाहीस ना

ह्मा हृदयाच्या गाभार्‍यातील सुगंध आहे तुझ्यामुळे
धुराप्रमाणे उदबत्तीच्या विरून जाणार नाहीस ना

विचार येता घाबरतो तू माझ्याआधी गेलीस तर
मी गेलो जर आधी तूही मोडून जाणार नाहीस ना

वदलो नाही आजवरी मी भाव मनातील तुला कधी
आज सांगतोय ऐकून तू अवघडून जाणार नाहीस ना

वळण आलं वाटेमध्ये सरळ जाणार नाहीस ना
तेव्हा माझा हात सोडून दूर जाणार नाहीस ना