नाही सुटणार आता अबोला
तुम्हा ओळखलंय मी राया
जरी केलीत लाडीगोडी
जरी पडलात माझ्या पाया || धृ ||

पहिल्या दिशी नजर भेटली
जशी आग मनी चेतली
तुमची प्रित अचुक हेरली

तुम्ही तन मी तुमची छाया
तुम्हा ओळखलंय मी राया || १ ||

डोळ्यामध्ये सुरेची झिंग
ओठ डाळिंबीचा रंग
सारं भरलं ज्वानीनं अंग

तरी जाता काम कराया
तुम्हा ओळखलंय मी राया || २ ||

तुम्हासाठी केला शिणगार
वाट बघत झाला अंधार
तुमच्या मनात तिचे विचार

मन धावे तिकडं जाया
तुम्हा ओळखलंय मी राया || ३ ||

किती असाल तुम्ही दिलेर
जा किती फिरा बाहेर
याल परतुनी इथे अखेर

करी जादू अशी ही काया
तुम्हा ओळखलंय मी राया || ४ ||

सतवायची तुमची खोड
घास लागत नाही गोड
चांगली सुचली मजला तोड

तुम्हा लावीन परत फिराया
तुम्हा ओळखलंय मी राया || ५ ||

नाही सुटणार आता अबोला
तुम्हा ओळखलंय मी राया
जरी केलीत लाडीगोडी
जरी पडलात माझ्या पाया || धृ ||