सत्याच्या भेटीस एकदा आले पाहा असत्य
रीतीनुसार सत्यही करी असत्याचे अतिथ्य
जुनी गोष्ट आहे तरीही ऐकुनी एकदा पाहा
सत्यामध्ये ह्या गोष्टीच्या लपले मोठे तथ्य ॥

सत्यास म्हणते असत्य आजचा दिन बघ आहे छान
संशयग्रस्त सत्य पण पाहे वरती करुनी मान
सत्यवचन ते बघता सत्याच्या येई लक्षात
हर्षोल्हासी दिसत सृष्टीचे होते पानन् पान ॥

फिरत वनातून आले दोघे असे जेथ पुष्करणी
असत्य म्हणते पाहा किती आल्हाददायी हे पाणी
आशंकित पण सत्य पुन्हा पाही पडताळून सत्य
परंतु भासे खचित असे आल्हाददायी ते चरणी ॥

जलक्रीडा करण्यास काढती वस्त्रे दोघे तेथे
हरखून गेले सत्य सलील ते आनंद इतुका देते
असत्यास पण कळले फळले होते कपट तयाचे
वस्त्रे चोरून सत्याची पोबारा करी कुठे ते ॥

अचंबित ते सत्य येतसे पुष्करणी त्यागून
असत्य कोठे फिरे विचारत गेले अन् भागून
बघता सारे फिरविती नजरा अशी त्याची अवस्था
असे तिरस्कृत झाले गेले जळी पुन्हा लाजून ॥

तेव्हापासून सत्य आपुला चेहरा लपवून राही
घालून वस्त्रे सत्याची अन् असत्य मिरवीत जाई
वस्त्रांमध्ये काय दडे ते कुणास पर्वा नसते
नग्न सत्य ह्या जगती कोणा पाहावयाचे नाही ॥