देव बसला वर आम्ही खाली जमिनीठायी
आजकाल तो ह्या बाजूला बघतच नाही ॥

नेते असे मातले त्यांची भरतच नाही झोळी
कार्यकर्त्यांच्या सरपणावर भाजतात आपली पोळी
त्याची दक्षिणाही म्हणतात ह्यांच्याच घशात जाई
आजकाल तो ह्या बाजूला बघतच नाही ॥

भाऊ-दादा नावे गुंड कुणालाही धरतात
पोलीस असे साधे लोक त्यांनाही घाबरतात
त्याचीच बहीण न्यायदेवता तिला नाही घाई
आजकाल तो ह्या बाजूला बघतच नाही ॥

गरिबांची होत नाहीत साधी साधी कार्य
प्रत्येक झारीत सरकारच्या बसले शुक्राचार्य
पगार मिळाला तरी कचेरीत जो तो पैसा खाई
आजकाल तो ह्या बाजूला बघतच नाही ॥

गरीब राहतो गरीब कारण पैसा ओढतो पैसा
अफरातफर गुन्हे करा नाहीतर तसेच बैसा
भाकर-तुकडा मिळत नसेल तर भोजन करा शाही
आजकाल तो ह्या बाजूला बघतच नाही ॥

प्रदूषण वाढलंय तापमान वाढलंय पृथ्वी गेली कावून
अवकाळी अन् पावसामध्ये शेतं गेली वाहून
प्रत्येक जागतिक नेता आपलं राजकारणच पाही
आजकाल तो ह्या बाजूला बघतच नाही ॥

महाग महाग औषधं शेठ लोकांकरता खास
गरीब जनता भोंदुगिरीवर ठेवते मग विश्वास
पैसे नाहीत इस्पितळाचं देणं भरण्यापायी
आजकाल तो ह्या बाजूला बघतच नाही ॥

देवाने सोपवलं जग माणसाच्या हातात
लाडक्या अपत्याने त्याच्या केला विश्वासघात
देवही म्हणतो आता मला शोधा तुमच्याच ठायी
आजकाल तो ह्या बाजूला बघतच नाही ॥

देव बसला वर आम्ही खाली जमिनीठायी
आजकाल तो ह्या बाजूला बघतच नाही ॥