आल्याचा मंद सुगंध
सुंदर दिसत होता रंग
म्हटलं थोडं आणखीन दुध घालू या
… आणि चहा दुधाळ झाला ॥

स्वयंपाकघरात नुसता घमघमाट
तोंडाला सुटले पाण्याचे पाट
म्हटलं थोडं आणखीन मीठ घालू या
… आणि रस्सा खारट झाला ॥

लोकांचे घसे बसले होते ओरडून
मी बोलरला काढलं होतं चोपून
म्हटलं थोडा आणखीन एक छक्का मारू या
… आणि बाउंड्रीवर कॅच गेला ॥

सहलीत चालली होती टिंगल-टवाळी
हसत होते सारे एकमेकांना देत टाळी
म्हटलं थोडा आणखीन विनोद करू या
… आणि समोरचा दुखावला गेला ॥

मैत्रीचं नातं असं घट्ट
संकटातही उभा राहायचा दत्त
म्हटलं थोडा आणखीन वाद घालू या
… आणि मित्र रुसून गेला ॥

पदोन्नतीकरता होती मुलाखत
यंदा माझाच चान्स होता दिसत
म्हटलं थोडा आणखीन मस्का लावू या
… आणि बॉसला राग आला ॥

मुलगा होता मेहनती बुद्धिमान
ठेवून होता आमचा मान
म्हटलं थोडा आणखीन सल्ला देऊ या
… आणि मुलगा दुरावला गेला ॥

मुलं आपल्या पायांवर उभी होती
भविष्याचीही चिंता नव्हती
म्हटलं थोडं आणखीन कमावून बघू या
… आणि हार्टअटॅक आला ॥

नातं जुळलं असं रेशमी
सुख-दुःखात एकत्र नेहमी
म्हटलं थोडं आणखीन गृहीत धरू या
… आणि नात्याला तडा गेला ॥

ही सवय करतेय घात
ह्याची गाठ बांधली मनात
म्हटलं ‘थोडं आणखीन’ बाजूला ठेवू या
… आणि आयुष्याचा गाडा रुळावर आला ॥