विसरू कसा मी माझ्या ताब्यात रात्र नव्हती
ती भेटली परंतु नशिबात मात्र नव्हती ॥

होतो लहान धाडस करण्यास नाही जमले
शिक्षिका होती माझी शाळेत छात्र नव्हती ॥

स्वप्नात घडली माझ्या अवतरली कॉलेजात
तिज सांगू इतुकी शक्ती मम काळजात नव्हती ॥

सहकर्मी वाट पाहे मी फक्त बोलण्याची
बोलेल शब्द ऐसी जिव्हा मुखात नव्हती ॥

खिडकीत त्या समोरील माझ्या मनीचे भाव
दावेल ऐसी खिडकी माझ्या घरात नव्हती ॥

एकीचे मुख उघडता वाचाच गेली माझी
भाषा तिची कळावी माझ्यात बात नव्हती ॥

उतरली आलिशान गाडीतूनी तिच्यावर
खर्चेन इतुकी रक्कम माझ्या खिशात नव्हती ॥

बागेत जाऊनिया म्हटले तिला विचारू
तिथली परंतु गर्दी माझ्या कह्यात नव्हती ॥

ती एक जिने होता केला पुढेही हात
माझ्या नियंत्रणात माझीच गात्रं नव्हती ॥

स्थळ पाहण्यास गेलो मैत्रीण पण मुलीची
गोडी तिच्यात होती ती त्या स्थळात नव्हती ॥

एकीच्या नयनी प्रीत पती पण उभा तिथेच
अर्थात माझी आता होण्यास पात्र नव्हती ॥

विसरू कसा मी माझ्या ताब्यात रात्र नव्हती
ती भेटली परंतु नशिबात मात्र नव्हती ॥