छोटंसं ते स्टेशन होतं
झाला होता उशीर
गाडी यायला वेळ होता
निघत नव्हता धीर ॥

छोटीशी पण स्वच्छ होती
तिथली वेटिंगरूम
कोणीच नव्हतं आत सगळी
होती सामसूम ॥

थोडाच वेळ झाला असेल
बसलो होतो वाचत
दोघे जण आत आले
सामान आपलं सावरत ॥

एक होती बाई मध्यमवयीन
देखणी छान
सुडौल होता बांधा आणि
कांती गोरीपान ॥

पुरूष चारचौघांसारखा
निटनेटका असा
खासगी कंपनीमधला कोणी
मॅनेजर जसा ॥

थोड्याच वेळात तेही दोघं
झाले स्थिरस्थावर
जुजबी बोलणं सुरू झालं
भीड चेपल्यावर ॥

तोही लागला बोलू आणि
तीही झाली बोलकी
एकमेकांसाठी तेही होते
अनोळखी ॥

बोलायला ती मोकळी होती
बोले भरभरून
गप्पाटप्पा साध्या तरीही
विषयाला धरून ॥

बोलता बोलता लक्ष जेव्हा
नव्हतं माझ्याकडे
नजर माझी जात होती
गोऱ्या गळ्याकडे ॥

आकर्षक ती होती मला
भावली होती फार
तिसरं कोणी नसतं आली
असती मग बहार ॥

बोलत होता तोही चेहरा
करून आपला लंपट
बोलणं त्याचं ऐकून माझा
संयम होता संपत ॥

प्रतिस्पर्धी होता झाला
नसता तो कबूल
पाहून त्याला उठत होता
माझा मस्तकशूळ ॥

समजून चुकली तीही बहुधा
बोले माझी नजर
टाळू लागली मला आणि
सावरू लागली पदर ॥

झाला असता स्पर्श माझा
चुकार तो सवंग
सावरून बसली ती आपलं
चोरून घेतलं अंग ॥

ठाऊक होता खेळ मला
जाणार नव्हतो हार
आयुष्यातील माझ्या नव्हती
पहिली ही शिकार ॥

त्याची मात्र सुरूच होती
असंबद्ध बडबड
लोचटपणे हसत होता
चेहरा होता बेरड ॥

मध्येच उठून आत गेली
हात धुवायला
माझी पुढची चाल मीही
लागलो ठरवायला ॥

सरकला तो माझ्याजवळ
माझ्याही नकळत
हातावरती हात ठेवला
ओशाळवाणं हसत ॥

काय चाललंय समजायलही
लागले दोन क्षण
किळसवाण्या जाणीवेने
भरला कणन् कण ॥

स्पर्शाची त्या ओळख पटली
अर्थ होता सरळ
झटकला मी हात शहारून
चढलं जसं झुरळ ॥

उठलो तिथून तडक सामान
लागलो माझं आवरू
धक्क्यातून त्या मन माझं
शकत नव्हतं सावरू ॥

खोलीत होतो फिरत मनात
पेटली होती आग
नजर त्याची करत होती
पण माझा पाठलाग ॥

कधी बाहेर येऊन बसली
समजलंही नाही
चित्त नव्हतं थाऱ्यावरती
सुचत नव्हतं काही ॥

काय वाटत असेल तिला
झाला साक्षात्कार
शिकाऱ्याचीच होत होती
पाहा आज शिकार ॥

वासनेचे बटबटीत असे
पाहून रंग भडक
गाडी येता माझी तिथून
निघून गेलो तडक ॥

आजही सुंदर नारी दिसता
घसरे माझं मन
प्रसंग आठवून त्या दिसाचा
आवरतो मी पण ॥

पुरूषी अहंकाराचीही होते
परतफेड
पुरूषांचीही कधी काढली
जाऊ शकते छेड ॥