चार दिसांनी फिरून येशील
परगावाहून आज खरा
वाट पाहती वाटेवरती
आसुसलेल्या ह्या नजरा

मीलन घटिका समीप आली
आज उशीर रे करू नको
गुपित आपुले आज रात्रीचे
विसरू नको रे विसरू नको ॥ १ ॥

परगावी तू जाण्याआधी
गडबडीत दिन ते गेले
कधी तयारी माझी नव्हती
कधी घरी अतिथी आले

जातानाचे नजरेमधले
भाव तुझे विस्मरू नको
गुपित आपुले आज रात्रीचे
विसरू नको रे विसरू नको ॥ २ ॥

वडीलधारे कोणी नाहीत
मुलेही आज घरी नसती
एकांताचे दंश मला बघ
पदोपदी शरीरी डसती

विरह भंगण्या लवकर ये रे
ताणून आणखीन धरू नको
गुपित आपुले आज रात्रीचे
विसरू नको रे विसरू नको ॥ ३ ॥

माळून गजरे केशांमध्ये
तुझ्याचसाठी मी नटले
धुंद सुगंधी शयनगृहही
तुझ्याचसाठी ते सजले

पुन्हा भाळशील माझ्यावरती
दीप आज मालवू नको
गुपित आपुले आज रात्रीचे
विसरू नको रे विसरू नको ॥ ४ ॥

नवतारूण्याचे दिन आपुले
सरून गेले जरी असती
माझ्याकरता मदन आज तू
तुझ्यासाठी मी आज रती

उधळू देत मनाला चौखूर
आज मला सावरू नको
गुपित आपुले आज रात्रीचे
विसरू नको रे विसरू नको ॥ ५ ॥

मोहरते मी विचार करता
तीव्र मनामधले स्पंदन
झुगारली मी लज्जा सारी
आज नाही कसले बंधन

उधाण घेऊन तूही ये रे
आज मना आवरू नको
गुपित आपुले आज रात्रीचे
विसरू नको रे विसरू नको ॥ ६ ॥