एक स्वप्न डोळ्यात असतं
पूर्ण करण्यासाठी
एक स्वप्न डोळ्यात असतं
मन रमविण्यासाठी

पहिल्या स्वप्नाकरिता लागे
मनातील ती जिद्द
दुसरं स्वप्न पाळत नाही
मनाचीही अन् हद्द

स्वप्नांसाठी जरूरी आहे विचार मनात जपणं
तुमच्या आमच्या मनात असतात अशीच काही स्वप्नं || १ ||

चंदू आणि बंडूचीही
आपली स्वप्नं होती
घर लहान माणसं फार
परिस्थितीच होती

चंदू म्हणे घ्यायचा आहे
फ्लॅट एक चांगला
बंडू म्हणे चंद्रावरच
बांधीन मी एक बंगला

चंदू सतत काळजीत बंडू आनंदात मग्न
तुमच्या आमच्या मनात असतात अशीच काही स्वप्नं || २ ||

सणवारी चंदूकडे
शिकरण आणि पोळी
बंडू मात्र मनापासून
खायचा पुरणपोळी

ओवरटाइम मिळतो म्हणून
चंदू रोज लेट
बंडू मुलांसंगे खेळे
रोज रोज क्रिकेट

बंडूला उमगलंच नाही चंदूचं हे खपणं
तुमच्या आमच्या मनात असतात अशीच काही स्वप्नं || ३ ||

बचत किती झाली चंदू
काळजी करे सतत
बंडू द्यायचा अडीअडचणीत
कोणालाही मदत

चिक्कू कंजूस अशी नावं
चंदूला शेलकी
कोजागिरीला बंडूकाका
पैसे देर्इलच की

बंडूचं वागणं चंदूला शक्यच नव्हतं पटणं
तुमच्या आमच्या मनात असतात अशीच काही स्वप्नं || ४ ||

बघता बघता वर्षं गेली
सुदिन तो आला
चंदूचा आपल्या मालकीचा
फ्लॅट बुक झाला

स्वप्नपूर्तीचा हर्ष मानसी
झाला चंदूला
सर्वात आधी पेढे त्याने
दिधले बंडूला

चंदूच्या मनीचा आनंद शक्यच नव्हता लपणं
तुमच्या आमच्या मनात असतात अशीच काही स्वप्नं || ५ ||

चाळ कधी जर दिसली आता
मनी म्हणे चंदू
विचार मजसारखा करूनिया
होर्इल सुखी बंडू

आजही चंद्रावरील बंगल्यात
सुखी असे बंडू
केली आजवर बचत फेडीतो
हप्ते अन् चंदू

कुणी ठरवावं सुखात आहे जास्त कुणाचं जगणं
तुमच्या आमच्या मनात असतात अशीच काही स्वप्नं || ६ ||

दु:ख अपेक्षाभंगाचं ते
चंदूच्या स्वप्नात
पण स्वप्नपूर्तीची नशाही असते
चंदूच्या स्वप्नात

बंडूसारखी स्वप्नं कधीच
शक्य होत नसतात
पण मुळात सुखी असणार्‍याचीच
स्वप्नं अशी असतात

स्वप्नात शोधणं सुख किंवा सुखात बघणं स्वप्नं
तुमच्या आमच्या मनात असतात अशीच काही स्वप्नं || ७ ||