सहा महिने तपश्चर्या
अशी केली घोर
पावला तेव्हा देव मजला
पाहून माझा जोर || १ ||

इन्स्टंट मागता सगळं म्हणून
पावलो मी लवकर
सहाच महिने तपश्चर्या
मिळेल एकच वर || २ ||

शब्द फुटेना आनंदाला
नव्हता पारावार
काय मागू काही सुचेना
सुरू केला विचार || ३ ||

आयुष्य मागू पैसा मागू
मागू आरोग्य
एकच संधी होती ठरेल
काय आता योग्य || ४ ||

तिष्ठत ठेवणं योग्य नव्हतं
परमेश्वराला
एवढ्यात एक साॅलिड विचार
मनामध्ये आला || ५ ||

एकच वरदान मजला प्रभो
द्यावे तुम्ही असे
स्वच्छ कळू दे मला समोरच्या
मनात काय वसे || ६ ||

तथास्तू मग प्रभू म्हणाले
घडला चमत्कार
कळला मजला देवाजीच्या
मनातला विचार || ७ ||

ठाऊक नाही पामरास ह्मा
हे कसले वरदान
पुढचं कळण्याआधी प्रभू
पावले अंतर्धान || ८ ||

शंका साऱ्या दूर सारल्या
विसरून गेलो भया
ओरडून सांगीन जगास आता
लो मै आ गया || ९ ||

प्रात:काळी उठलो
ऐकला बायकोचा विचार
स्वयंपाकाचा कंटाळा
आलाय आज फार || १० ||

तिला म्हणालो संध्याकाळी
बाहेर घेऊ जेवण
ऐकून चेहरा झाला तिचा
हसरा एकदम ए वन || ११ ||

साहेबाला खूश केलं
गोष्टं नव्हती साधी
प्रत्येक फार्इल नेऊन दिली
त्याने मागण्याआधी || १२ ||

म्हंटलं मनात काय फक्कड
वरदान मागून घेतलं
आयुष्यात सुरळीत होर्इल
आता पुढचं सगळं || १३ ||

एवढ्यात ऐकू आलं
साहेब मनात होता म्हणत
ह्माच्याकडनंच करून घेतो
आता ढोर मेहनत || १४ ||

उदास होऊन परत आलो
माझ्या जागेवर
साहेबाने पाठवून दिला
कामाचा डोंगर || १५ ||

दमून परतताना ट्रेनला
होती भारी गर्दी
प्रत्येकाचे विचार ऐकून
शुद्ध हरपली अर्धी || १६ ||

चेहरे वरून शांत परंतु
मनात कोलाहल
प्रत्येक जण पचवत होता
आपले हलाहल || १७ ||

इमारतीचा वाॅचमन करतो
सलाम हसून गाली
विचार त्याचे ऐकून माझी
शक्ती क्षीण झाली || १८ ||

मर मर काम करतो
मारतो मोठी स्टार्इल
रोज वेगळया मित्राबरोबर
असते ह्माची बार्इल || १९ ||

एका दिवसात समजून चुकलो
गोष्ट कामाची
झाकली मुठ बरी असते
सव्वा लाखाची || २० ||

विश्वासाची माणसं पाठीत
खुपसतात खंजीर
समजलं हे जेव्हा झाला
होता फार उशीर || २१ ||

जिथे जार्इन तिथे ऐकतो
जगाचे मी व्याप
ऐकून ऐकून दमून गेलो
भरला मजला ताप || २२ ||

डाॅक्टर इस्पितळात म्हणती
लगेच भरती व्हा
मनात म्हणती उरले ह्माचे
महिने फक्त सहा || २३ ||

कालपर्यंत सुखात होतो
झालो आता कष्टी
वर मिळवण्यापूर्वी होती
दॄष्टीआड सॄष्टी || २४ ||

इस्पितळातली कंटाळवाणी
असते ती दिनचर्या
सहा महीने आहेत पुन्हा
करतोय तपश्चर्या || २५ ||