पहिली मीटिंग आटोपल्यावर
एअरपोर्ट गाठलं थेट
गेल्यानंतर कळलं तिथे
फ्लार्इट होतं लेट || १ ||

भूक लागली होती म्हटलं
नाश्ता करीन थोडा
एअरपोर्टवरच घेतला एक
बिस्कीटांचा पुडा || २ ||

तळकट नसतात आणि
असते कमी त्यात शुगर
चाळीशीला आले माझी
मेंटेण्ड होती फिगर || ३ ||

वी आय पी लाउंजमध्ये
थंडगार ती बैठक
वाचत बसले अर्धवट
सोडलेलं मी पुस्तक || ४ ||

बिस्कीटं अन् पर्स होती
शेजारच्या खुर्चीवर
एक बिस्कीट खाऊ लागले
काही वेळानंतर || ५ ||

एक मनुष्य बसला होता
पलीकडच्या खुर्चीवर
एक बिस्कीट त्यानेसुद्धा
घेतलं माझ्यानंतर || ६ ||

आश्चर्याने त्याच्याकडे
वळून मी पाहिलं
मान झुकवून त्याने मला
स्माइल एक दिलं || ७ ||

अशा अनाहूत सलगीला पण
ओळखून होते नीट
दुर्लक्षून आणखीन एक
घेतलं मी बिस्कीट || ८ ||

माझ्या कोरड्या प्रतिसादाला
न घालता भीक
पुन्हा त्याने बिस्कीट घेतलं
माझं एक अधिक || ९ ||

वागण्याकडे त्याच्या लक्षच नाही
होते दाखवत
पण आत मात्र संतापाने
होते मी खदखदत || १० ||

असं करत शेवटचं एक
बिस्कीट राहिल्यावर
अर्धं बिस्कीट तोडून त्याने
केला पाहा कहर || ११ ||

तेवढ्यात माझ्या फ्लाइटबद्दल
शब्द कानी आले
अर्धं बिस्कीट तसंच सोडून
तेथून मी निघाले || १२ ||

बोर्डिंग सुरू झालं होतं
गेले मग मी आत
आगाऊ ते वागणं नव्हतं
मनामधून जात || १३ ||

करून उथळ खोट्यानाट्या
सलगीचा बहाणा
निम्मी बिस्कीटं खाऊन गेला
कसा तो शहाणा || १४ ||

मोबाइल शोधण्याकरता
हात आत घातला
तर पर्समध्ये बिस्कीटाचा
पुडा हाती लागला || १५ ||

गोंधळ सरला डोक्यात माझ्या
प्रकाश पडला लख्ख
बिस्कीटं त्याच्या पुड्यातली
मी खाल्ली होती चक्क || १६ ||

पुडा विकत घेऊन माझ्या
पर्समध्ये मी ठेवला
त्याचा पुडा माझा म्हणून
निम्म्यावर मी खाल्ला || १७ ||

मघाचचे ते चित्र माझ्या
डोळ्यासमोर आले
आपले वागणे आठवून मग मी
मेल्याहूनही मेले || १८ ||

त्याच्या जशा वागण्यावर मी
चिडले होते अशी
खरं तर मीच त्याच्याबरोबर
वागले होते तशी || १९ ||

सारखाच प्रसंग मी तर संतापाने
बसले कुढत
त्याने मात्र अर्धा हिस्सा
दिला तोही हसत || २० ||

आयुष्यात बऱ्याच ठिकाणी
व्यक्ती अशा भेटतात
नकळत आपणा बरंच काही
शिकवून त्या जातात || २१ ||

धन्यवादही घेतला नाही
शिकवून गेला धडा
कारण होतं साधा एक
बिस्कीटांचा पुडा || २२ ||