बरेच दिवस घोळत होता संशय माझ्या मनात
गडबड आहे नक्की माझ्या बायकोच्या कानात
ह्मा बाबतीत समजत नव्हतं करू तरी काय मी
माझ्या बायकोला ऐकू येतंय का हो कमी || १ ||

कान नाक घसा तज्ज्ञ होता माझा मित्र
भेटून त्याला मनचं माझ्या स्पष्ट केलं चित्र
मित्राने सांगितली मला शक्कल एक नामी
माझ्या बायकोला ऐकू येतंय का हो कमी || २ ||

बेडरूममधला टीवी तिने बंद केला जसा
घराबाहेर जाऊन माझा खाकरला मी घसा
शक्कल कामास येर्इल त्याने घेतली होती हमी
माझ्या बायकोला ऐकू येतंय का हो कमी || ३ ||

दारातून ओरडलो आज काय आहे जेवण
उत्तर नाही बाहेर आले शेजारचे चौघेजण
पहिलीच पायरी होती तसा होतो मी संयमी
माझ्या बायकोला ऐकू येतंय का हो कमी || ४ ||

बेडरूमच्या दारात जाऊन पुन्हा विचारलं पण
तरीही उत्तर आलं नाही होतं काय जेवण
तिच्यापर्यंत पोहोचत नव्हती माझी वित्तंबातमी
माझ्या बायकोला ऐकू येतंय का हो कमी || ५ ||

अगदी जवळ जाऊन पुन्हा प्रश्न विचारला तर
लिहीत होती पाहिलं नाही मानही करून वर
संशय पक्का झाला हृदय झालं माझं जखमी
माझ्या बायकोला ऐकू येतंय का हो कमी || ६ ||

वार्इट वाटलं मन माझं भरून आलं आत
जवळ बसलो तिनेच माझा हातात घेतला हात
चेहर्‍यावरती तिच्या भरले होते भाव छद्मी
माझ्या बायकोला ऐकू येतंय का हो कमी || ७ ||

किती वेळा सांगू आहे भाकरी आणि कालवण
तरीही परत परत विचारतोस काय आहे जेवण
मित्राला दाखवून ये तुला ऐकू येतय कमी
माझ्या बायकोच्या कानात काहीच नव्हतं कमी || ६ ||

आपल्यामध्ये उणीव विश्वास नसतो कोणाला
हसतो लोकाला अन् शेंबूड आपल्या नाकाला
कानाचं हे यंत्र लावणं आहे माझ्याच जन्मी
माझ्या बायकोच्या कानात काहीच नव्हतं कमी || ९ ||