विमानतळावर घोषणेची पाहत बसलो होतो वाट
बरीच विमानं लेट होती गर्दी झाली होती दाट
बोलणं गदारोळात त्यांचं बसलो होतो ऐकत
आवाज आला मला कुणीतरी होतं छद्मी हसत || १ ||

समोरची ती वयस्क बार्इ सांगत होती नवर्‍याला
किती दिसांनी भेटेल आता आपला मुलगा आपल्याला
इतके दिवस तिकडे राहिला कसा असेल तो दिसत
आवाज आला मला कुणीतरी होतं छद्मी हसत || २ ||

वेटिंगरूमच्या फोनवरती लागला एकजण ओरडायला
पोहोचतोच आहे थोड्या वेळात पाहून घेतो तुम्हाला
पैसे तयार ठेवा नाहीतर नाही तुम्ही वाचत
आवाज आला मला कुणीतरी होतं छद्मी हसत || ३ ||

नवविवाहित जोडपं एक थोडं बसलं होतं दूर
कुजबुजला तो कानात तर ती बोलली लाजून चूर चूर
तिथे पोहोचेपर्यंत तुजला धीर नाही का निघत
आवाज आला मला कुणीतरी होतं छद्मी हसत || ४ ||

मागे बसले होते दोघे फोन एकाचा वाजला
मुलगी झाली ओरडला तो अक्षरश: नाचला
म्हणे चाललो मी तर घरी टूर गेली उडत
ह्मा वेळी मात्र कुणीही नव्हतं छद्मी हसत || ५ ||

थोड्याच वेळात अनाउंसमेंटचे शब्द कानावर आले
माझं फ्लाइट नव्हतं बाकी सारे तयारही झाले
वेळेत पोहोचू आता सारे आपसात होते बोलत
पुन्हा आवाज आला कुणीतरी होतं छद्मी हसत || ६ ||

बहुतेक सारे गेले वेटिंगरूम रिकामी मग झाली
माझं फ्लाइट लेट घोषणा माझ्या अन् कानी आली
हसत होतं कोण नक्की मला नव्हतं कळत
आता मात्र आजूबाजूस कोणीच नव्हतं हसत || ७ ||

बसलो होतो वाचत कल्लोळ झाला तेथे जबरदस्त
आताच जे गेलं ते विमान झालं होतं अपघातग्रस्त
समजून चुकलं मला माझं मन नव्हतं सावरत
ऐकून बोलणं त्यांचं त्यांना नियतीच होती हसत || ८ ||

हे करीन अन् ते करीन ही बाष्फळ बडबड नुसती
पुढचा विचार करायची आता बसली आहे धास्ती
भविष्यकाळातले मनोरे आपण असतो बांधत
नियती मात्र करमणुकीने असते तेव्हा हसत || ९ ||