नोकरीत दिवस पहिला
उशीर नको सहीला
वेळ पाळणं जमलं
स्वतंत्र माझी जागा
घोड्याची जणू पागा
कामही सुरु झालं || १ ||

आजूबाजूस बघता
वेळ कुणाला नव्हता
सर्वच ते सिनिअर
मग्न आपल्या विचारी
सुखी आणि संसारी
मीच एक बॅचलर || २ ||

दिसली कोपऱ्यात दूर
आपल्याच कामात चूर
पहिल्यांदा ती मला
कोणाच्या ना अध्यात
आणि नाही मध्यात
म्हटलं बोलू चला || ३ ||

वाजला होतं दीड
चेपल्यावरती भीड
काढला माझा डबा
तिला विचारल्यावरती
मला म्हणाली ती
बस की रे बाबा || ४ ||

चेहेरा होतं साधा
परंतु सुडौल बांधा
चष्मा लावे मोठा
लावे ना पावडर
गोऱ्या चेहेऱ्यावर
लाली नव्हती ओठा || ५ ||

काही मग दिवसांत
मैत्री होई आमच्यांत
एक वाटे नवल
राखुनिया अंतर
तिच्याहून इतर
टाळत तिला सरळ || ६ ||

अखेर न राहवून
टाकलं मी विचारून
सोडे ती सुस्कारा
मोठी ती गोष्ट
सांगणे तुज इष्ट
प्रकार काय तो सारा || ७ ||

पुढल्या रविवारी
गेलो तिच्या घरी
गोष्ट तिची ऐकायला
सांगते तुजला ऐक
ऑफिसमध्येच कैक
प्रियकर होते मजला || ८ ||

पहिला तो प्रियकर
बॉस माझ्यावर
वरलं होतं त्याला
केली खूपच मौज
फिरायची मज हौस
कळलं होतं त्याला || ९ ||

एकदा फिरण्यासाठी
गाठली अन् चौपाटी
भेळ होतो चरत
आली मोठी लाट
घेऊन गेली आत
दिसलाच नाही परत || १० ||

दुसरा होतं क्लार्क
दिसला माझ्यात स्पार्क
माझेही मन बसे
शरीरयष्टी जाड
होता तो खादाड
आवडत त्याला मासे || ११ ||

जेवायचं आमंत्रण
भाकरी अन् कालवण
बेत होतं खास
घशात अडके काटा
मिटल्या श्वसनवाटा
तिथेच खेळ खलास || १२ ||

तिसरा कॉन्ट्रॅक्टर
होतं जो चॅप्टर
भेटायचा गुपचूप
कथा अशी प्रेमाची
आवड सिनेमाची
दोघांनाही खूप || १३ ||

गेलो फिल्म पाहाया
अमिताभ आणि जया
थेटरात लागली आग
गर्दीत इकडे तिकडे
शोधलं सगळीकडे
पण लागला नाही माग || १४ ||

माझा काय गुन्हा
घडती पुनःपुन्हा
प्रसंग माझ्या बाबतीत
चेहेरा तिचा भकास
मीही होई उदास
बसून तिच्या संगतीत || १५ ||

ऑफिसमधले सारे
राहती दूर बिचारे
तिची वाटते भीती
मोठी वयाने जरी
मनोमनी तिजवरी
जडली माझी प्रीती || १६ ||

म्हटलं घाबरू नकोस
दुःखाचे हे डोस
बसू नको तू पीत
आज उशीर जाहला
पुन्हा भेटीन तुला
मनीचे वदिन गुपित || १७ ||

वदून असे मी उठलो
घरून बाहेर पडलो
होतो तरंगत
पायरी तुटली होती
पद ठेवायची खोटी
पुढचे विसंगत || १८ ||

मोडली माझी मान
तरीही नशीबवान
वाचलो जीवानिशी
आता दूरच बसतो
लांबूनच मी हसतो
खोड जिरली अशी || १९ ||