रविवारची सकाळ
माझी धूत होतो कार
नवीन माझी कार
मला प्रिय होती फार || १ ||

पाउस पडला होता
कालची सारी रात
लावून देणार नव्हतो पण
अन्य कोणा हात || २ ||

चिंटू उठला होता
आज मजा करायचा वार
खेळत होता कारभोवती
वय त्याचं चार || ३ ||

डावी बाजू धुवू लागलो
बदलून साबणपाणी
दगड पत्य्रावर घासल्याचा
आवाज आला कानी || ४ ||

जाऊन पाहिलं डोळ्यावरती
विश्वास बसला नाही
कारच्या दारावर चिंटू
लिहित होता काही || ५ ||

मस्तकशूळ उठला माझा
हरपून गेलं भान
तडक त्याला धरून त्याचा
जोरात पिळला कान || ६ ||

विचार करण्यापलीकडे मी
गेलो होतो पार
मिळेल त्याने हातावरती
केले चार प्रहार || ७ ||

दगड होता हाती त्याच्या
बंद होती मुठ
तरीही थांबलो नाही त्याला
मारलं मी बेछूट || ८ ||

कळवळून ओरडला तो
गेली त्याची शुद्ध
रक्त पाहून हातावरचं
मीही झालो स्तब्ध || ९ ||

पाहून मलूल चेहरा हृदयी
उठली माझ्या कळ
तडक उचललं त्याला आणि
गाठलं इस्पितळ || १० ||

डॉक्टरांनी उपचार केले
शुद्ध त्याला आली
चेचली होती पण संपूर्ण
तीन बोटं गेली || ११ ||

परत आलो कारवर
काढला माझा राग
तोडू लागलो त्याच पान्याने
कारचे सारे भाग || १२ ||

तोडता तोडता नजर गेली
उजव्या दारावर
पाहून पार कोसळलो मी
लिहिलं जे त्यावर || १३ ||

‘आय लव माय डॅडी’
पत्य्रावरती होते शब्द
वाचून शब्द वाकडे तिकडे
काळीज माझं दग्ध || १४ ||

शंभर गाड्या ओवाळीन मी
सांगत नाही खोटं
चिंटूची जर परत येणार
असतील तीन बोटं || १५ ||

आजही चिंटू माझ्यावरती
तितकंच प्रेम करतो
पण हाताकडे पाहत आपल्या
नेहमी प्रश्न पुसतो || १६ ||

कधी उगवतील माझ्या हाती
बोटं माझी परत
प्रयत्न केला तरीही मनातून
प्रश्न नाही तो सरत || १७ ||

अघोरी मी वागलो त्याची
बोटं झाली वजा
चूक माझी एकट्याची पण
भोगतोय दोघं सजा || १८ ||