रामराव आणि शामराव होते सख्खे शेजारी
कुटुंबं त्यांची एकमेकांच्या सहवासात रमत
रामराव आणि शामराव मात्र शिष्ट होते भारी
कुठल्याच गोष्टीत त्या दोघांचं होत नसे एकमत ॥

चढाओढ चाले त्या दोघांची लहान लहान गोष्टीत
एकमेकांना नावं ठेवताना दोघं नसत दमत
सणा समारंभात म्हणत आमचीच वरचढ रीत
कुठल्याच गोष्टीत त्या दोघांचं होत नसे एकमत ॥

रामरावांचा मुलगा होता शामरावांची मुलगी
पडले प्रेमात एकमेकांशिवाय नव्हतं करमत
दोघांच्याही पित्यांना ही पटणार नव्हती सलगी
कुठल्याच गोष्टीत त्या दोघांचं होत नसे एकमत ॥

असल्या गोष्टी लपत नसतात कळलंच एका रात्री
रामराव आणि शामरावांवर कोसळला जणू पर्वत
आपलीच जात श्रेष्ठ होती दोघांनाही खात्री
कुठल्याच गोष्टीत त्या दोघांचं होत नसे एकमत ॥

मित्र त्यांचा होता एक गेले त्याच्या घरी
दोघांचीही मुलं आता त्यांचं नव्हती ऐकत
त्या मित्राचं बोलणं जरा ऐकून घेत जरी
कुठल्याच गोष्टीत त्या दोघांचं होत नसे एकमत ॥

मित्र म्हणाला ह्या नात्याचा केलात तुम्ही अव्हेर
व्यभिचार होईल तो तुम्हाला कसं नाही समजत
व्यभिचार चालेल लग्न चालणार नाही जातीबाहेर
आयुष्यात आज प्रथमच झालं दोघांचं एकमत ॥

माझी जात वरचढ आणि त्याची आहे कोती
काळानुरूप न बदलता बसले पाय ओढत
एवढा मोठा देश त्यात अठरा पगड जाती
जात नाही ती जात ह्यावर सर्वांचं एकमत ॥