गळ्यात सोनं बोटांत अंगठ्या अंगात मात्र खादी
फोर्ड स्कॉर्पिओ ऑडी आणखीन मर्सिडीज एखादी
अशी माणसं दारी आली ओळखावं अचूक
आली निवडणूक ॥ १ ॥

आरोपांच्या चिखलफेकीचा माजला गदारोळ
चव्हाट्यावरी लक्तरं धुती भिडती जैसे पोळ
प्रत्येकाची लफडी बाकी साऱ्यांना ठाऊक
आली निवडणूक ॥ २ ॥

दारी येती हात जोडूनी अनोळखी ते चेहेरे
गाढ मैत्रीचे हसणे साऱ्या चेहेऱ्यांवरती लहरे
विचारपूस करतात आपुली होऊन ते भावूक
आली निवडणूक ॥ ३ ॥

जाहीर म्हणती जात धर्म ते सर्व आम्हा सारखे
खाजगीत पण तेच वागती नीतीला पारखे
आज अचानक सहिष्णुतेची करती ते जपणूक
आली निवडणूक ॥ ४ ॥

दीन आणखी दलितांचा येई त्यांना कळवळा
दारिद्र्याचा चिखल पाहूनी अश्रू येती घळघळा
समाजोद्धार करण्याची मग लागे त्यांना भूक
आली निवडणूक ॥ ५ ॥

अलंकार अन् गाड्यांची त्या ठाऊक तुम्हा किंमत
आले कोठून विचारण्याची नाही तुमची हिंमत
घरकूल तुमचे छोटे त्याची करा तुम्ही जपणूक
आली निवडणूक ॥ ६ ॥

सामाजिक माध्यमांत होई प्रचाराचा भडिमार
प्रत्युत्तर देण्याच्या फंदात पडू नका तुम्ही फार
मित्र कोणता तुमचा धरील तुमच्यावरती डूख
आली निवडणूक ॥ ७ ॥

सुट्टी आली अचानक पाहा वाह वा फारच छान
केस कापण्या जाताना मग उरकून या मतदान
पुढची पाचही वर्षेंं व्हा मग पुन्हा एकदा मूक
आली निवडणूक ॥ ८ ॥

कर्णकर्कश वाद्य आणखी फटाक्यांचाही जोर
निवडून दिला पाहा तुम्ही हो नवा कोणता चोर
पाहा मॄत नजरेने तुमच्या भव्य ती मिरवणूक
झाली निवडणूक ॥ ९ ॥