दिसतो जसा चित्रपटातील नट
त्याच्या गोर्या भाळी उतरलेली वात्रट
बोटाने मागे सारावी ती बट
असं मुलींना कधीच वाटत नाही का? || १ ||
समोरच्या खिडकीकडे माझं सारं लक्ष
तो उभा असतो खात कधी सफरचंद कधी द्राक्ष
टाकेल का इथे एखादा कटाक्ष
असं मुलींना कधीच वाटत नाही का? || २ ||
कधी असंच त्याने माझ्या घरी यावं
गालात हसत मला काहीतरी विचारावं
मी अबोधपणे त्याच्या सहवासातच हरवावं
असं मुलींना कधीच वाटत नाही का? || ३ ||
बसमध्ये चढताना तो दिसावा
बाकी कुठेही बसण्यास वाव नसावा
माझ्या शेजारीच येऊन बसावा
असं मुलींना कधीच वाटत नाही का? || ४ ||
कॉलेजला जायची त्याची माझी एकच वाट
वाटेत मध्येच झाडी घनदाट
दचकून त्याने मध्येच धरावा माझा हात
असं मुलींना कधीच वाटत नाही का? || ५ ||