पुन्हा उत्सव आज
बटबटीत तो बाज
कानांवरच्या हातांमधुनी ठणठणतो आवाज
रस्त्यामध्ये मांडव
दिवसरात्रीचे तांडव
रांगा लावून दर्शन घेती पंचक्रोशीतील बांधव
माझा सोडून प्रत्येकाचा चेहरा आहे हसरा
माझ्या देशामध्ये कसा हा मीच जाहलो उपरा || १ ||
थुंकतो कुणी थेट
फेके कुणी सिगरेट
कचरा करण्यासाठी लावला सार्यांनी जणू नेट
घाण पुढे अन् पश्च
नाक धरावे गच्च
साबण लावून स्नान करावे तरी वाटे अस्वच्छ
बाकी सारे मजेत केवळ मलाच दिसतो कचरा
माझ्या देशामध्ये कसा हा मीच जाहलो उपरा || २ ||
सांगतो कुणी जात
कुणी धर्माची बात
कुणी राहतो भाषा प्रांतांच्या भिंतींच्या आत
कुणी पत्नीला छळे
कुणी छेडी मुलींना बळे
कुणी आपुल्या कन्यांचे गर्भात कापतो गळे
परंपरांच्या पडद्याखाली म्हणती विवेक विसरा
माझ्या देशामध्ये कसा हा मीच जाहलो उपरा || ३ ||